نجل شقيقة الفنان محمد بسيوني يكشف حقيقة إصابته بالسرطان واعتزاله الفن قبل رحيله

كشف ابن شقيقة الفنان محمد بسيوني ، الكثير من التفاصيل حول وفاته وشخصيته، وذلك بعد رحيل بسيوني عن عالمنا يوم الجمعة 16 أغسطس 2024، تاركًا خلفه سيرة عطرة بالمحبة والود ومسيرة إبداعية حافلة بالأعمال الفنية البارزة.

ويقدم لكم موقع الأيام المصرية، تفاصيل صرح بها نجل شقيقة الفنان محمد بسيوني، في حوار خاص للموقع، عن حياة بسيوني الشخصية والفنية، تخليدًا لذكراه.

ابن شقيقة محمد بسيوني ينعي خاله معلنا موعد العزاء

نعى ابن شقيقة الفنان محمد بسيوني في تصريحات خاصة لموقع الأيام المصرية، الفقيد، كاشفا عن تفاصيل في حياته، سواء الشخصية أو الفنية، مؤكدًا أن الدفن وصلاة الجنازة أقيمت بمسقط رأسه، عقب صلاة الجمعة.

وعن شخصية محمد بسيوني وأخلاقه في قريته ووسط عائلته، قال ابن شقيقته: خالى  كان أطيب واحد فى الدنيا، وأقرب واحد ليا بعد أبويا، خالى كان فنان محترم جدا وبيحب شغله وبيحب كل الناس، وكان ليه أدوار كتير كتير جدا سواء أفلام أو مسلسلات ومسرحيات وكانت أدواره كلها محترمة جدا، أدوار بتوصل رسائل هادفة للمجتمع ومكنش بيقبل أى دور وكل زملائه في الوسط الفني يعرفوا عنه كده كويس.

من هو الفنان محمد بسيوني ؟ وما هي دراسته ومؤهله الدراسي؟

صرح أحمد ابن شقيقة الفنان محمد بسيوني، أن الفنان الراحل تخرج في كلية الإعلام، ثم درس في معهد التمثيل، ومنه إلى المسرح القومي، قائلا: خالى حصل على معهد التمثيل، وبعد كده التحق بكلية الاعلام وتخرج منها، وكمل فى المسرح القومي للتلفزيون،على فكرة كل الناس فى القرية بتحبه، بسبب أخلاقه واحترامه للكبير والصغير، حتى النساء بالقرية لما كان ينزلنا زيارة، كان بيقف يسلم على أي حد في سكته، لدرجة أني كنت بتكسف وأنا ماشى معاه، الحمد لله ربنا كتبله خاتمة حسنة، إنه مات صباح الجمعة، وصلينا عليه صلاة الجنازة بعد صلاة الجمعة بمسجد القرية".

ابن شقيقة محمد بسيوني ينفي شائعة مرض الفقيد

نفى ابن شقيقة محمد بسيوني، الشائعات التي ترددت بشأن مرضه بسرطان الدم، مؤكدا أنه لم يعاني من سرطان الدم كما قال البعض في مواقع إخبارية.

إذ قال: خالي توفاه الله بعد ما روحنا بيه المستشفى بحوالي ساعتين بس، دفناه عندنا في قرية قسطا بمركز كفر الزيات، كان مريض بس مش من فترة كبيرة، بس هو مش عنده سرطان فى الدم زى ما نازل في المواقع، 

وتابع: هو كان بيشتكي من ألم فى بطنه عادى زى أي حد، وبعد الكشف عليه اكتشفنا إنه عنده ورم فى المعدة وبدأنا نمشى فى الإجراءت العلاجية، وفعلا أخد جلسة كيمياوى السبت اللي فات كانت أول جلسه له.

أسرة الفنان محمد بسيوني 

كشف أحمد عبد الرؤوف حزين، ابن شقيقة الفنان محمد بسيوني، في تصريحاته لموقع الأيام المصرية، الكثير من تفاصيل حياة بسيوني الشخصية وعلاقته بأسرته وعائلته.

وقال:  محمد بسيوني كان أخويا الكبير مش أبويا ولا خالي، هو وحيد اخواته على تسع بنات، كلهم متجوزين وأجداد، هو الأخ قبل الأخير بين أخواته، كان الابن اللى بعد أمى على طول، مكنش بيسبنا في أي مناسبة على طول بيزورنا، رغم شغله فى التمثيل ويعرف معارف كتير بس مكنتش بيتكبر على حد، والحمد لله رب اختارله يوم الجمعة وتوفاه فيه".

وعن أسرته، قال: “كان متزوج عنده ولد وبنت مهند ورؤى، مهند لسه مخلص ثانوية عامة، ورؤى في ثالثة كلية، زوجته مدرسة بالأزهر الشريف، خالى فى الأصل فلاح ابن فلاح”.

وعن حقيقة اعتزال محمد بسيوني، قال: " مكنش معتزل لا، بس كان منتظر أدوار تكون كويسة مش هابطة، لأنه كان بيحب التمثيل، وعنده ثقة أن الفن رسالة، ولازم يوصل بيه حاجة تفيد الناس، مكنش فيه فرص كويسة للأسف واكتفى بشغله بالمسرح وكان بيعمل مسرحيات وشارك فيها فى حياة كريمة اللى كانت تحت إشراف السيد رئيس الجمهورية، إنما سينما وتلفزيون مكنش بيرضى بالأدوار اللي مش كويسة".

وأضاف: مع إنه يعرف ممثلين كبار، وعلاقاته بيهم كويسة بس كان ينحرج يقول لحد فيهم إنه يشيله دور معاه كويس فى فيلم ولا مسلسل".

ابن شقيقة الفنان محمد بسيوني يناشد أشرف زكي بالاهتمام بالفنانين

ناشد ابن شقيقة الفنان محمد بسيوني، الدكتور أشرف زكي نقيب المهن التمثيلية، للأهتمام بالفنانين الذين لم تتاح لهم الفرصة للمشاركة في أعمال فنية، بعدما اقتصرت الساحة على فنانين بعينهم.

قائلا: أنا حابب أوجه كلمه للدكتور أشرف زكي، إنه فيه ممثلين كتير زى خالي وأفضل كمان منتظرين فرصة ليهم تكون كويسة، ياريت حضرتك تدور عليهم وتشاركهم فى أعمال السينما والتلفزيون، خالى من بعد ما خلص دبلوم مسرح وهو شغال في الفن وكان بيحب شغله جدا وكان منتظر فرصة بس تكون كويسة يثبت نفسها بيها، خصوصا الأعمال الكتير جدا اللى عملها بس كانت أدوار للأسف بسيطة، بس 
سابت أثر كبير في الدراما والسينما المصرية، وكل اللى اشتغل معاه، وكلهم يعرفوه، كنت بشارك خالى كل حاجه، عشان كده أنا بعت مناشدة للدكتور أشرف زكي، إنه يهتم بالممثلين اللى زى خالي، ويديهم فرصة كويسه، خصوصا إنهم ملهومش مصدر دخل غير ده، بس طالما خالي توافاه الله يبقى اللى عايش هوه أولى، لعل وعسى المناشدة توصل ليهم، ويكون موت خالى سبب فى إنهم حد يعرفهم أو يسمع عنهم".

ابن شقيقة محمد بسيوني يشكر نهال عنبر وأشرف زكي على متابعة حالة بسيوني قبل رحيله

أعرب ابن شقيقة الفنان محمد بسيوني عن احترامه للدكتور أشرف زكي نقيب المهن التمثيلية والفنانة نهال عنبر، موجها الشكر لهما على  متابعة حالة الفنان الصحية، وتسهيل بعض الأوراق الخاصة بعلاجه.

لا يفوتك

مراتي بقت خطيبتي .. أحمد سعد يعلن خطوبته من علياء بسيوني

علياء بسيوني وأشرف عبد الباقي يتصدران تريند محركات البحث جوجل.. ما السبب؟

قائلا: دكتور أشرف ومدام نهال عنبر كانوا بيتابعوا معايا حالة خالي، وكنت بكلم أشرف زكي بنفسي عشان يخلصلنا ورق قرار العلاج، الصراحة الناس مقصروش في حاجه".